ᖁᓕᑦ ᐅᑭᐅᑕᒫᑦ ᓄᓇᕗᒻᒥ ᒪᓕᒐᓕᐅᕐᕕᒃ ᓴᖅᕿᑦᑎᔭᕆᐊᖃᖅᑎᑕᐅᔪᖅ ᐃᖕᒥᒃᑰᖅᑐᒥᒃ ᐊᒻᒪᓗ ᐃᑲᔪᖅᑐᐃᓂᖃᙱᑦᑐᓂᒃ ᓂᕈᐊᕐᕖᑦ ᑭᒡᓕᖏᓐᓄᑦ ᑲᑎᒪᔨᓂᒃ ᕿᒥᕐᕈᓂᐊᖅᑐᓂᒃ ᑕᐃᒪᐅᕌᓂᒃᑐᓂᒃ ᓂᕈᐊᕐᕕᖕᓄᑦ ᑭᒡᒐᖅᑐᖅᑕᐅᕝᕕᖕᓂᑦ ᖃᐅᔨᓗᑎᒡᓗ ᓄᓇᕗᒻᒥᐅᓂᑦ ᐊᔪᙱᓐᓂᐊᖅᑐᒃᑯᑦ ᑭᒡᒐᖅᑐᐃᓂᖅᑕᖃᕋᓗᐊᕐᒪᖔᑦ ᒪᓕᒐᓕᐅᕐᕕᒃ.
ᑲᑎᒪᔩᑦ ᒪᓕᖃᑦᑕᖅᑐᑦ ᓄᓇᕗᒻᒥ ᓂᕈᐊᖅᑐᓕᕆᓂᕐᒧᑦ ᐱᖁᔭᕐᒥᑦ ᐊᒻᒪᓗ ᑐᑭᐅᔪᑦ ᐱᔾᔪᑕᐅᔪᒧᑦ ᒪᓕᒐᓕᐅᕐᕕᖕᒥᙶᖅᑐᒥᑦ. ᐃᓱᒪᒋᔭᕆᐊᖃᖅᑕᖏᑦ ᓄᓇᐅᔪᖅ, ᖃᓄᖅ ᐃᓄᐃᑦ ᐊᒥᓲᑎᒋᓂᖏᑦ ᐊᓯᐊᙳᕋᔭᕐᒪᖔᑕ, ᓄᓇᓕᖕᒥᑦ ᐱᔭᐅᔪᒪᔪᑦ, ᐃᓄᐃᑦ ᖃᐅᔨᒪᔭᑐᖃᖏᑦ, ᐊᓯᖏᓪᓗ ᐱᔾᔪᑕᐅᔪᑦ ᐊᓯᐊᙳᖅᓯᖁᔨᓗᑎᒃ ᑭᒡᒐᖅᑐᖅᑕᐅᕝᕕᖕᓄᑦ ᓯᕗᓂᒃᓴᒥᑦ ᓄᓇᕗᒻᒥ ᓂᕈᐊᖅᑎᑦᑎᓂᕐᓄᑦ.
ᑲᑎᒪᔩᑦ ᑲᑎᑦᑎᐊᓂᒃᐸᑕ ᑐᑭᓯᐅᒪᔾᔪᑎᓂᒃ ᐊᒻᒪᓗ ᑐᓴᕐᕕᒋᑉᓗᒋᑦ ᓄᓇᕗᒻᒥᐅᑕᐃᑦ, ᐅᓂᑉᑳᓕᐅᖃᑦᑕᖅᑐᑦ ᒪᓕᒐᓕᐅᕐᕕᖕᒧᑦ ᐅᖃᖅᓯᒪᑉᓗᑎᒃ ᓱᓇᑐᐃᓐᓇᐃᑦ ᑲᑎᒪᔨᓄᑦ ᐊᓯᐊᙳᖁᔭᐅᔪᑦ ᐊᒦᓲᑎᒋᓂᖏᓐᓄᑦ, ᐊᕕᒃᑐᖅᓯᒪᔪᓄᑦ, ᐅᕝᕙᓘᓐᓃᑦ ᑭᒡᒐᖅᑐᖅᑕᐅᕝᕖᑦ ᐊᑎᖏᓐᓄᑦ ᓄᓇᕗᒻᒥ ᓂᕈᐊᖅᑎᑦᑎᓂᕐᓄᑦ ᐊᑐᕐᓂᐊᖅᑐᓂᒃ. ᓱᓇᑐᐃᓐᓇᐃᑦ ᐊᓯᐊᙳᖅᑐᑦ ᑎᑎᕋᖅᓯᒪᑉᓗᑎᒃ ᐆᒃᑑᑎ ᐱᖁᔭᒃᓴᓕᐊᒥᑦ ᐅᖃᖅᑎᒧᐊᖅᑕᐅᑉᓗᓂ, ᐊᒻᒪᓗ ᐱᖁᔭᒃᓴᖅ ᑐᓴᖅᑎᑦᑎᔾᔪᑕᐅᑉᓗᓂ ᒪᓕᒐᓕᐅᕐᕕᖕᒧᑦ ᐃᓱᒪᒃᓴᖅᓯᐅᕈᑎᒋᔭᐅᓂᐊᕐᓗᓂ ᐊᑐᓕᖅᑎᑕᐅᓂᐊᓵᖅᑎᓪᓗᒍ.
ᑲᑎᒪᔨᐅᓚᐅᖅᓯᒪᔪᑦ
ᐱᖓᓱᓂᒃ ᑲᑎᒪᔨᑕᖄᓂᒃᓯᒪᔪᖅ ᓂᕈᐊᕐᕖᑦ ᑭᒡᓕᖏᓐᓄᑦ ᑲᑎᒪᔨᓂᒃ ᓄᓇᕗᒻᒥᑦ.
ᓯᕗᓪᓕᖅᐹᖅ ᓂᕈᐊᕐᕖᑦ ᑭᒡᓕᖏᓐᓄᑦ ᑲᑎᒪᔩᑦ ᓄᓇᕗᒻᒧᑦ 1997-ᒥᐅᓚᐅᖅᑐᖅ. ᑲᑎᒪᔩᑦ ᐋᖅᕿᒃᓯᔪᖕᓇᓚᐅᖅᑐᑦ ᓂᕈᐊᖅᑐᓕᕆᓂᕐᒧᑦ ᑭᒡᓕᐅᔪᓂᒃ ᓯᕗᓪᓕᖅᐹᖅ ᓂᕈᐊᖅᑎᑦᑎᓂᕐᒧᑦ ᓄᓇᕗᒻᒥᑦ, ᑎᕆᒡᓗᐃᑦ (ᐄᐳᕆ) 1, 1999-ᒥᑦ. ᑲᑎᒪᔩᑦ ᐱᔭᐅᖁᔭᖏᑦ ᐃᓱᒪᒃᓴᖅᓯᐅᕈᑕᐅᓂᐊᕐᓗᑎᒃ ᒪᓕᒐᓕᐅᕐᕕᖕᒧᑦ ᓄᓇᑦᑎᐊᕐᒥᑦ, ᒐᕙᒪᑐᖃᒃᑯᓐᓄᑦ ᒥᓂᔅᑕᒧᑦ ᐃᖅᕿᓕᖕᓄᑦ ᐊᒻᒪᓗ ᐅᑭᐅᖅᑕᖅᑐᒥᑦ ᑲᒪᔨᓄᑦ ᐊᒻᒪᓗ ᑭᖑᓪᓕᖅᐹᒃᑯᑦ ᐃᓱᒪᓕᐅᕐᓂᐊᕐᓗᓂ ᓂᕈᐊᕐᕖᑦ ᑭᒡᓕᖏᓐᓄᑦ.
ᑲᑎᒪᔩᑦ ᐃᓱᒋᔭᖃᕆᐊᖃᓚᐅᖅᑐᑦ ᒪᕐᕉᒃ ᐊᑐᖅᑕᐅᔪᖕᓇᖅᑐᓂᒃ:
- ᖁᓕᐅᓗᒋᑦ ᐅᕝᕙᓘᓐᓃᑦ 11-ᖑᓗᒋᑦ ᑭᒡᒐᖅᑐᖅᑕᐅᕝᕖᑦ, ᒪᕐᕉᖕᓂᒃ ᒪᓕᒐᓕᐅᖅᑎᖃᕐᓗᑎᒃ
(ᖁᓕᐅᓗᑎᒃ ᐅᕝᕙᓘᓐᓃᑦ 11-ᖑᓗᑎᒃ ᐊᑐᓂ ᑭᒡᒐᖅᑐᖅᑕᐅᕝᕖᑦ ᒪᕐᕉᖕᓂᒃ ᒪᓕᒐᓕᐅᖅᑎᖃᕐᓗᑎᒃ, 20-ᓂᒃ 22-ᓄᑦ-ᒪᓕᒐᓕᐅᖅᑎᖃᕐᓗᓂ): - 20-ᓂᑦ 22-ᓄᑦ ᑭᒡᒐᖅᑐᖅᑕᐅᕝᕕᖃᕐᓗᓂ, ᐊᑕᐅᓯᕐᒥᒃ ᒪᓕᒐᓕᐅᖅᑎᖃᕐᓗᑎᒃ.
ᑲᑎᒪᔩᑦ 20-ᓂᒃ ᑭᒡᒐᖅᑐᖅᑕᐅᕝᕕᖃᖁᔨᓚᐅᖅᑐᑦ, ᐊᑕᐅᓯᕐᒥᒃ ᐊᑐᓂ ᒪᓕᒐᓕᐅᖅᑎᖃᕐᓗᑎᒃ. ᐃᓱᒪᒋᔭᖃᓚᐅᕐᒥᔪᑦ ᐱᖓᓱᐊᓂᑦ ᐊᑐᖅᑕᐅᔪᖕᓇᖅᑐᒥᒃ, ᐅᖃᐅᓯᐅᒻᒪᕆᓚᐅᖏᑦᑑᒐᓗᐊᖅ ᐱᔭᒃᓴᐅᑎᒋᔭᖏᓐᓂᑦ, ᐊᔪᕐᓇᖅᑎᑕᐅᓚᐅᖏᑦᑐᖅ ᐃᓱᒪᒃᓴᖅᓯᐅᕈᑕᐅᓂᐊᕐᓗᓂ.
ᑭᖑᓪᓕᖅᐹᖅ ᐱᖁᓚᐅᖅᑕᖓᑦ ᑲᑎᒪᔩᑦ 17-ᓂᒃ ᒪᓕᒐᓕᐅᖅᑎᖃᕐᓗᑎᒃ, ᐊᑕᐅᓯᕐᒥᒃ ᐊᑐᓂ ᑭᒡᒐᖅᑐᐃᕝᕖᑦ ᒪᓕᒐᓕᐅᖅᑎᖃᕐᓗᑎᒃ.
ᑲᑎᒪᔩᑦ ᐅᓂᑉᑳᖓᑦ ᒪᓕᒐᓕᐅᕐᕕᖕᒧᐊᖅᑕᐅᓚᐅᖅᑐᖅ ᓄᓇᑦᑎᐊᕐᒥᑦ ᐊᒻᒪᓗ ᐃᓱᒪᒃᓴᖅᓯᐅᕈᑕᐅᑉᓗᓂ. ᐅᖃᖃᑎᖃᖅᖄᖅᑎᓪᓗᒋᑦ ᓄᓇᕗᒻᒥ ᓯᕗᓕᖅᑎᐅᔪᓂᑦ, ᒪᓕᒐᓕᐅᕐᕕᒃ ᓄᓇᕗᑦᑎᐊᕐᒥᑦ 19-ᓂᒃ ᒪᓕᒐᓕᐅᖅᑎᖃᖁᔨᓚᐅᖅᑐᑦ, ᐊᑕᐅᓯᕐᒥᑦ ᐊᑐᓂ ᑭᒡᒐᖅᑐᖅᑕᐅᕝᕕᖕᓂᑦ. ᐱᖁᔭᐅᓂᖅ ᓈᒻᒪᒋᔭᓚᐅᖅᑐᖅ ᒐᕙᒪᑐᖃᒃᑯᓐᓄᑦ ᒥᓂᔅᑕᒧᑦ ᒥᓂᔅᑕᒧᑦ ᐃᖅᕿᓕᖕᓄᑦ ᐊᒻᒪᓗ ᐅᑭᐅᖅᑕᖅᑐᒥᑦ ᐱᕙᓪᓕᐊᔪᓕᕆᔨᒃᑯᓐᓄᑦ. ᑕᐃᒪᓐᓇᒧᑦ, ᓯᕗᓪᓕᖅᐹᖅ ᒪᓕᒐᓕᐅᕐᕕᒃ ᓄᓇᕗᒻᒥᑦ 19-ᓂᒃ ᒪᓕᒐᓕᐅᖅᑎᖃᓚᐅᖅᑐᖅ, ᐊᑐᓂ ᒪᓕᒐᓕᐅᖅᑏᑦ ᐊᑕᐅᓯᕐᒧᑦ ᑭᒡᒐᖅᑐᖅᑕᐅᕝᕕᖕᒧᑦ.
ᑐᒡᓕᐊ ᓄᓇᕗᒻᒥ ᓂᕈᐊᕐᕖᑦ ᑭᒡᓕᖏᓐᓄᑦ ᑲᑎᒪᔩᑦ ᓴᖅᕿᑕᐅᓚᐅᖅᑐᑦ 2006-ᒥᑦ.
ᐅᓂᑉᑳᖓᑦ ᒪᓕᒐᓕᐅᕐᕕᖕᒧᐊᖅᑕᐅᑉᓗᓂ, ᐊᒻᒪᓗ, ᑭᖑᓂᐊᒍᑦ ᐃᓱᒪᒃᓴᖅᓯᐅᕈᑎᒋᔭᐅᖅᖄᖅᑎᓪᓗᒍ, ᐅᓂᑉᑳᖅ ᕿᐱᓗᒃᑕᐅᓚᐅᖅᑐᖅ. 19 ᒪᓕᒐᓕᐅᖅᑏᑦ ᓱᖁᓯᙱᖦᖢᑎᒃ.
ᐱᖓᓱᖓᑦ ᓄᓇᕗᒻᒥ ᓂᕈᐊᕐᕖᑦ ᑭᒡᓕᖏᓐᓄᑦ ᑲᑎᒪᔩᑦ 2011-ᒥᐅᓚᐅᖅᑐᖅ. ᐊᒥᓱᙳᕆᐊᖁᔨᓚᐅᖅᑐᑦ ᒪᓕᒐᓕᐅᖅᑎᖏᑦ 19-ᓂᑦ 22-ᓄᑦ. ᐱᖁᔨᓂᖏᑦ ᓈᒻᒪᒋᔭᐅᓚᐅᖅᑐᑦ ᐊᒻᒪᓗ ᐊᒥᓱᙳᕆᐊᖅᑕᐅᑉᓗᑎᒃ ᒪᓕᒐᓕᐅᖅᑏᑦ 22-ᓄᑦ.
ᒫᓐᓇᐅᔪᖅ ᓯᑕᒪᒋᓕᖅᑕᖓᑦ ᓄᓇᕗᒻᒥ ᓂᕈᐊᕐᕖᑦ ᑭᒡᓕᖏᓐᓄᑦ ᑲᑎᒪᔩᑦ. ᐱᔭᒃᓴᐅᑎᒋᔭᖏᑦ ᑎᑎᕋᖅᓯᒪᔪᑦ ᑐᑭᐅᔪᑦ ᐱᔾᔪᑕᐅᔪᒥᑦ. ᑲᑎᒪᔩᑦ ᐃᓱᒪᒃᓴᖅᓯᐅᕈᑎᖃᕆᐊᖃᖅᑐᑦ ᑭᒡᓕᐅᔪᓂᒃ 22 ᒪᓕᒐᓕᐅᖅᑎᓄᑦ ᐊᒻᒪᓗ, ᓱᓇᑐᐃᓐᓇᒥᒃ ᐱᔾᔪᑎᖃᕐᓗᑎᒃ, 23-ᓂᒃ ᒪᓕᒐᓕᐅᖅᑏᑦ ᐅᖓᑖᓄᐊᕆᐊᖃᙱᑦᑐᑦ.